मिडिया काउन्सिल विधेयकविरुद्ध पत्रकार महासंघ दोस्रो चरणको आन्दोलनमा

मुख्य समाचार विषेश समाचार सूचना प्रविधि

काठमाडौँ, ५ जेठ, २०७६ । मिडिया काउन्सिल विधेयकविरुद्ध पहिलो चरणको आन्दोलन सम्पन्न गरेको पत्रकार महासंघले दोस्रो चरणको आन्दोलनका कार्यक्रम घोषणा गरेको छ । आइतबार अध्यक्ष गोविन्द आचार्यको अध्यक्षतामा बसेको केन्द्रीय समितिको बैठकले थप आन्दोलनका कार्यक्रमहरू घोषणा गरेको हो ।

नेपाल सरकार मन्त्री परिषदवाट पारित भई संसदमा बैशाख २६ गते दर्ता भएको मिडिया काउन्सिल सम्वन्धी विधेयकका प्रावधानप्रति महासंघको गम्भीर ध्यानाकर्षण भई त्यसको विरोधमा महासंघले गरेको पहिलो चरणको आन्दोलन सफलतापूर्वक सम्पन्न भएको निष्कर्ष निकालेको छ । पहिलो चरणको आन्दोलन सफल पार्न सहयोग पुर्याउने आम सञ्चारकर्मी, मानव अधिकारवादीहरु, पेशागत संघसंगठनहरु, नागरिक समाज र सम्बन्धित सबैमा महासंघले आभार तथा धन्यवाद प्रकट गरेको छ ।

पहिलो चरणको आन्दोलन सम्पन्न हुँदासमेत महासंघले उठाएका जायज मागहरु सम्वोधन गर्नेतर्फ सरकारले कुनै गम्भीरता नदेखाएको आरोप लगाएको छ । बैठकपछि जारी विज्ञप्तिमा भनिएको छ, ‘समस्या समाधान गर्न सरकार सकारात्मक नदेखिएकाले महासंघले दोस्रो चरणको आन्दोलन घोषणा गरेको छ ।’

केन्द्रीय समितिको बैठक अघि पत्रकार महासंघको आयोजनामा संचार सम्वद्ध विभिन्न संघ, संगठन र संस्थाका अध्यक्ष तथा प्रतिनिधिहरुसँग संयुक्त बैठक पनि बसेको थियो । उक्त बैठकमा प्राप्त सुझाव समेतका आधारमा मिडिया काउन्सिल विधेयकको प्रेस स्वतन्त्रता विरोधी प्रावधानका विरुद्ध जेठ ६ गतेदेखि २५ गतेसम्म संघर्षका कार्यक्रम सार्वजनिक गरेको हो । विरोध र संघर्षका कार्यक्रममा सम्पादकहरूसँग छलफलदेखि मानव साङ्गलो बनाउने र आकस्मिक विरोध प्रदर्शन गर्नेसम्मका छन् ।

संघर्षका कार्यक्रमहरु:

  • जेठ ६ र ७ गते – महासंघका पूर्वअध्यक्षहरुसँग छलफल र परामर्श ।
  • जेठ ८ गते – संसद् प्रतिनिधित्व गर्ने राष्ट्रिय पार्टीहरुको ध्यानाकर्षण गराउने ।
  • जेठ ९ देखि १२ गतेसम्म – सञ्चारमाध्यमका सम्पादकहरुसँग भेट गरी सञ्चार अभियान सञ्चालन गर्ने ।
  • जेठ १३ र १४ गते – सांसदहरुसँग भेट गरी छलफल गर्ने ।
  • जेठ १६ र १७ गते – प्रेस स्वतन्त्रता सेनानीको ऐक्यवद्धता ।
  • जेठ १८ देखि २० गतेसम्म – महासंघको प्रतिष्ठान शाखा र एसोसिएटहरुको आयोजनामा उक्त विधेयकका कारण समाचार कक्षमा पर्ने प्रभावबारे छलफल कार्यक्रम चलाउने ।
  • जेठ २१ र २२ गते – महासंघका जिल्ला शाखाहरुले राजनीतिक दल, सञ्चारकर्मी, नागरिक संघसंस्था, पेशाकर्मी र अधिकारकर्मीसँग अन्तरक्रिया गर्ने ।
  • जेठ २३ र २४ गते – केन्द्रमा राजनीतिक दल, सञ्चारकर्मी, नागरिक संघसंस्था, पेशाकर्मी र अधिकारकर्मीसँग अन्तरक्रिया गर्ने ।
  • जेठ २५ गते – अपरान्ह ३ः०० बजे बानेश्वरदेखि बबरमहलसम्म मानव हातेसाङ्लो बनाई बृहत प्रदर्शन गर्ने । काठमाडौं उपत्यका बाहिर प्रदेश राजधानी रहेको स्थानमा सोही खालको प्रदर्शन गर्ने र त्यसको संयोजन प्रदेश समितिले गर्ने ।
  • मिडिया काउन्सिल विधेयक संसद्मा पेश हुने दिन देशव्यापी रुपमा आकस्मिक विरोध प्रदर्शन गर्ने ।