हावाहुरी पीडितलाई कर्णाली प्रदेश सरकारको एक करोड

प्रदेश मुख्य समाचार विषेश समाचार

वीरेन्द्रनगर, २४ चैत, कर्णाली प्रदेश सरकारले प्रदेश २ का विभिन्न जिल्लाहरुमा आएका हावाहुरीबाट प्रभावितहरुका लागि एक करोड रुपियाँ उपलब्ध गराउने निर्णय गरेको छ । शनिबार बसेको प्रदेश मन्त्रिपरिषद् बैठकले हावाहुरीबाट प्रभावित भएकाहरुका लागि प्रदेश २ ले स्थापना गरेको मुख्यमन्त्री राहत कोषमा जम्मा गर्ने निर्णय गरेको हो ।

आन्तरिक मामिला तथा कानुन मन्त्री नरेश भण्डारीले बारा, पर्सालगायतका जिल्लाहरुमा आएको हावाहुरीले ठूलो धनजनको क्षति भएकाले कर्णाली प्रदेश सरकारकातर्फबाट एक करोड राहत उपलब्ध गराउने निर्णय भएको बताए ।

‘हावाहुरीले तराईमा ठूलो मानवीय तथा भौतिक क्षति पु¥याएको छ’ आन्तरिक मामिला मन्त्री भण्डारीले भने, ‘प्रदेश सरकारका तर्फबाट प्रदेश २ को मुख्यमन्त्री राहत कोषमा जम्मा हुने गरेर एक करोड रुपियाँ उपलब्ध गराउने निर्णय गरेका छौं ।’

यस्तै प्रदेश मन्त्रिपरिषद् बैठकले कर्णाली प्रदेश अस्पताललाई तीन सय शैय्याको प्रशारण (रेफरल) अस्पतालमा स्तरोन्नति गर्ने निर्णय गरेको छ । ‘हाल ५० शैय्याको प्रदेश अस्पताललाई शिक्षण अभ्याससहितको तीन सय शैय्याको प्रशारण अस्पतालमा स्तरोन्नति गर्ने निर्णय भएको छ’ बैठकपछि मन्त्री भण्डारीले भने, ‘जनशक्ति र प्रविधि उपलब्ध गराउनेसहितका निर्णयहरु यसमा समेटिएका छन् ।’