बुद्धिमान र हरिकाजीलाई जर्मनी बस्‍ने नेपालीको आर्थिक सहयोग

मुख्य समाचार विषेश समाचार समाज

काठमाडौं, २४ चैत, मजदुरी गर्ने क्रममा घाइते भएका बुद्धिमान कुवँर र हरिकाजी ढुंगानाको उपचारार्थ विदेशमा बस्‍ने नेपालीहरूले सहयोग उपलब्ध गराएका छन् । विशेषगरी जर्मनीमा बस्दै आएकी गोरखा परिवारकी बन्दना पुन बुढा मगरको पहलमा कुँवर र ढुंगानालाई आर्थिक सहयोग गरिएको हो।

उक्त रकम घाइते कुँवर र ढुंगानालाई हस्तान्तरण गरिएको छ। शनिवार काठमाडौंमा एक कार्यक्रमकाबीच जर्मनीबाट बन्दना पुन बुढामगरको पहलमा संकलन गरिएको एक लाख चार हजार रूपैयाँ कुवँर र ढुंगानालाई ५२/५२ हजार रूपैयाँ पर्नेगरी हस्तान्तरण गरिएको हो । बन्दनाको तर्फबाट उनकी बहिनी पत्रकार देविका घर्ती मगरलगायतका पत्रकारहरूको उपस्थितिमा उक्त रकम हस्तान्तरण गरिएको छ।

बन्दनाको पहलमा जर्मनी, युके, पोर्चुगलमा बस्दै आएका ३७ जना नेपालीहरूले उक्त रकम संकलन गरेर पठाएका हुन् । सुशील पुन, इनुशा बुढामगर, हेमा तामाङ, अम्बिका लिम्बू, मनिता राई, सरिता सुनुवार, राधा गुरूङ, दिपिका शाक्य, निशा राई, विना गुरूङ, विष्णु राई, हेमा गुरूङ, इन्दिरा राई, रिता पुर्जा, गौसरी पुन छन्त्याल, रिष्मा राई, अर्जना देवान, सिर्जना राई, सरिता गुरूङ, अना राई, पावी सुनुवार, बन्दना पुन बुढामगर, सुरेश बिकेआइ, संगीता पुन, समिता थापा, आशा लिम्बू, रोशनी राई, शिलु पुन, एलिशा राई, हेलेन याक्खा, देओ राई, शितल गुरूङ, राधा लिम्बू, सम्सीला गुरूङ, लक्ष्मी आले, मनिला कन्दङ्वाले सहयोग गरेका हुन्।

विशेषगरी देश विदेशमा रहनुहुने नेपाली दाजुभाइ दिदीबहिनीहरूको सहयोगले आफ्नो नियमित उपचार गर्न सहयोग पुगेको भन्दै घाइते बुद्धिमान कुँवर र हरिकाजी ढुंगानाले धन्यवाद ज्ञापन गरे। उनीहरूले राज्यले उपचारमा केही सहयोग नगरे पनि सहयोगी मन भएका नेपालीहरूको सहयोगले अहिले उपचार गर्न सँगै बाँच्‍न सहज भएको प्रतिक्रिया दिएका छन् ।

को हुन बुद्धिमान र हरिकाजी?
बैजनाथ गाउँपालिका ८ बाँके निवासी २३ वर्षीय बुद्धिमान कुँवरले भारतमा मजदुरी गर्ने क्रममा दुवै हात र एउटा खुट्टा गुमाएका थिए। उनका एक श्रीमती र एक छोरा छन्।

यसैगरी रूपाकोट मझुवागढी नगरपालिका ६ दिक्तेल खोटाङ निवासी ३६ वर्षिय हरिकाजी ढुंगाना विद्युत प्राधिकरणमा काम गर्ने क्रममा विजुलीको झट्का लागेर दुवै हात र एउटा खुट्टा गुमाएका थिए। उनका श्रीमती र दुई छोरी छन्।

केही समयदेखी कुँवर र ढुंगानाको उपचारका निम्ती सामाजिक सञ्जालमार्फत सहयोग अभियान चलिरहेको छ। उनीहरू अहिले काठमाडौंमा डेरा गरेर उपचार गराइरहेका छन्।

तस्विरहरू: केशव गुरूङ

Loading...