पारस खड्का नगदसहित सम्मानित, भन्छन् ‘यो सफलता मेरोमात्रै होइन’

खेलकुद मुख्य समाचार विषेश समाचार

काठमाडौँ, ५ चैत, नेपाली राष्ट्रिय क्रिकेट टोलीका कप्तान पारस खड्कालाई एक लाख रूपैयाँसहित सम्मान गरिएको छ । मंगलबार राजधानीको प्रज्ञाभवनमा आयोजित काठमाडौँ युथ कन्क्लेभ २०१९ मा खड्कालाई नगद रुपैयाँसहित सम्मान गरिएको हो ।

सम्मानसँगै खड्कालाई ‘युथ आइकन २०१९’ घोषणा पनि गरिएको छ । क्रिकेट लगायत अन्य क्षेत्रबाट नेपाली युवाहरूलाई नेपालमै केही गर्न र सफल हुन सकिन्छ भनी प्रेरित गरी युवा क्षेत्रमा योगदान दिए बापत उनलाई सम्मान प्रदान गरिएको आयोजकले बताएको छ ।

विभिन्न शैक्षिक पृष्ठभूमि, समुदाय र क्षेत्रका युवा विद्यार्थीहरूलाई एउटै सम्मेलनमा आह्वान गर्दै काठमाडौँका युनिभर्सल कलेज, न्यू समिट कलेज, अपोलो इन्टरनेशनल कलेज, काठमाडौँ मोडेल कलेज र हिमालय कलेज अफ इन्जिनियरिङ्गको संयुक्त आयोजनामा काठमाडौँ युथ कन्क्लेभ २०१९ सम्पन्न गरेका हुन् । कार्यक्रम चैतन्य इन्टिच्युट अफ म्यानेजमेन्टको सहयोग र राष्ट्रिय युवा परिषद्को प्रवद्र्धनमा सम्पन्न गरिएको थियो ।

कार्यक्रमका प्रमुख अतिथि सांसद योगेश भट्टराईले युवाहरूको प्रतिभा र कार्यक्षमतामा नेपालले भविष्यको आशा बोकेको बताएका छन् । उनले भने, ‘देश बनाउने दायित्व अब नयाँ युवा पुस्ताको पनि हो भन्ने बुझाउनका लागि यो कार्यक्रम अत्यन्त जरुरी छ ।’ लामो समयदेखि शान्ति, सद्भाव र सहिष्णुतालाई अँगाल्दै आएको नेपाललाई अब आधुनिक विश्वमा चिनाउन युवा पुस्ताले देशमै केही गर्नुपर्ने उनले सुझाव दिए ।

सम्मान ग्रहण गरेपछि बोल्दै नेपाली राष्ट्रिय क्रिकेट टोलीका कप्तान पारस खड्काले खेलकुदमार्पmत् राष्ट्रियताको भावना र एकता ल्याउन सकिने बताए । उनले भने, ‘हामी नेपाली क्रिकेट टोली सफल भयौँ किनकि हामी आफ्नो खेल र देशप्रति इमान्दार छौँ ।’ उनले नेपाली क्रिकेटको सफलतामा आफ्नो मात्रै हात छ कि भनेर नबुझिदिन आग्रह गर्दै भने, ‘पारस खड्काले गर्दा क्रिकेट यहाँ पुगेको होइन । यसमा सबै टिमका साथीहरु, कोच र हामीलाई जस्तोसुकै परिस्थितिमा सहयोग गर्नुहुने फ्यानहरुको हात छ । म उहाँहरुको प्रतिनिधि मात्र हुँ ।’

कार्यक्रममा युवा विद्यार्थीहरूलाई सफलताका लागि सही दिशानिर्देश गर्ने उद्देश्यले विभिन्न क्षेत्रका सफल व्यक्तित्वहरूले प्रेरणात्मक सम्बोधन गरेका थिए । कार्यक्रममा मिस नेपाल २०१८ शृङ्खला खतिवडाले पर्यटन प्रवर्द्धन मार्फत समृद्धिबारे, प्रधानमन्त्रीका सूचना प्रविधि सल्लाहकार असगर अलिले ई–कमर्स र सूचना प्रविधिबारे, युट्युबर सिसन बानियाँले आफ्नो रुचिलाई व्यवसायमा कसरी परिणत गर्ने भन्ने बारे, ज्योति ग्रुपका निर्देशक तथा स्याकार ट्रेडिङ्ग कम्पनीका अध्यक्ष सौरभ ज्योतिले नेपालको व्यापारिक वातावरणबारे तथा सन्दीप क्षेत्रीले कसरी समूहमा चिनिने भन्नेबारे सम्बोधन गरेका थिए ।

युवाहरूलाई नेतृत्व, व्यवस्थापन र औद्योगिक सीपहरूमा मद्दत गर्ने लक्ष्यका साथ आयोजित काठमाडौँ युथ कन्क्लेभ २०१९ मा काठमाडौँका विभिन्न कलेजहरूबाट करिब तीन हजार विद्यार्थीको उपस्थिति रहेको थियो । उक्त कार्यक्रममा विभिन्न कलेजका तर्फबाट सांस्कृतिक प्रस्तुतिहरू, प्रदर्शनी, खाना स्टल, गेम जोन लगायत पनि राखिएको थियो ।

Loading...