व्यावसायिक सिस्नो खेती आम्दानीको स्रोत

मुख्य समाचार रोजगार

गाईघाट, उदयपुर, १ मङ्सिर उदयपुरको त्रियुगा नगरपालिका–१५ साउनेका कृषकले व्यावसायिक सिस्नो खेतीबाट वर्षेनी राम्रो आर्थिक आम्दानी गर्दै आएका छन् । साउनेका कृष्णमाया मगरले यस पटक पनि सिस्नो बिक्रीको समय शुरु भएका कारण आफूले उत्पादन गरेको सिस्नो बिक्री गर्ने तयारी गरेको बताउनुभयो । घर वरपरको पाखा र बारीको काल्लामा व्यावसायिक सिस्नो खेती गर्दै आएको उहाँले दशैँ र तिहारको बीचमा झण्डै रु १० हजारको सिस्नो बिक्री गरेको बताउनुभयो । यस पटक उहाँले मङ्सिरदेखि माघ महीनासम्ममा  पचास हजारभन्दा माथिको सिस्नो बिक्री गर्ने लक्ष्य राख्नुभएको छ ।

साउनेको गैह्राटोलमा केही वर्षयता कृषकले व्यावसायिक सिस्नो खेती नै गर्दै आएको हर्कबहादुर मगरले बताउनुभयो । सिस्नो जिल्ला सदरमुकाम गाईघाट बजारका होटल तथा घरमा माग हुने गरेकाले बजारको समस्या नरहेको उहाँको भनाइ छ ।

प्रत्येक हप्ताको बुधबार र शनिबार आफूहरुले सिस्नो गाईघाट बजार पुर्याउने गरेको र प्रतिकिलो रु ४० देखि ६० मूल्यसम्ममा बिक्री हुने गरेको कृषक जीतबहादुर मगरले जानकारी दिनुभयो । यहाँका बासिन्दाले वार्षिक रु बीसदेखि पचास हजारभन्दा माथिसम्मको सिस्नो बिक्री गर्ने गरेका छन् ।सदरमुकामस्थित मेलिना होटलका सञ्चालक गङ्गा राई वर्षेनी पाँच हजारभन्दा बढीको सिस्नो आफुले खरीद गरेर खाने गरेको बताउनुभयो । (रासस)