सुदूर पश्मिमकै इज्जत हुन् पाँचौँ डाँन  ‘निर्मला

खेलकुद मुख्य समाचार

शेरबहादुर सिंह भीमदत्तनगर, २३ असोज निरन्तर प्रयासका कारण सुदूरपश्चिम ‘पाँचौँ डाँन’ बन्ने पहिलो महिला खेलाडीमा आफ्नो नाम लेखाउन सफल कञ्चनपुरको भीमदत्तनगरपालिका–३ भाषीकी ३३ वर्षीया निर्मला डगौंरा दुई दशकदेखि निरन्तर खेलजगत्मा सक्रिय हुनुहुन्छ । तेह्र वर्षकै उमेरदेखि तेक्वान्दो खेलमा प्रवेश गर्नुभएकी उहाँले धेरै राष्ट्रिय प्रतियोगितामा सहभागी भई उपाधिसमेत प्राप्त गर्नुभएको छ        “खेलप्रतिको लगनशीलता र मेहनतले आज प्रदेशको पाँचाँै डाँन बनेको हुँ ।” राससको कुराकानीमा खुशी व्यक्त गर्दै निर्मला भन्नुहुन्छ, “यसको श्रेय खेलगुरु र मेरा अभिभावकलाई जान्छ।”

खेलप्रति लगाव भएकै कारण उहाँ  दिनको एक पटक यहाँस्थित खेलपरिसर पुग्नुहन्छ । गत २०७४ सालमा घुँडामा देखिएको चोटका कारण अन्तर्राष्ट्रिय खेलकूद प्रतियोगितामा भने निर्मला सहभागी हुन पाउनु भएन । “विभिन्न राष्ट्रिय प्रतियोगितामा दर्जनौँ पटक सहभागी भए पनि शारीरिक समस्या हुँदा मुलुक बाहिर जान भने रोकिएँ ।” उहाँ भन्नुहुन्छ, “खेलकूदमा लागेर दाम नकमाए पनि नाम भने कमाएकी  छु ।” “पाँचौँ डाँन बन्न सक्नु त्यति सजिलो होइन ।” निर्मला भन्नुहुन्छ, “यसका विभिन्न मापदण्ड र चरण पार गर्दै सफल हुनेसके मात्रै सम्भव होइन्छ।” सिनियरतर्फ प्रथम ब्ल्याक बेल्ट (प्रथम डाँन) २०५६ सालमा लिनुभएकी निर्मला पाँचाँै डाँनमा हालै मात्र पुग्नुभएको हो ।“मसँगैका धेरै खेलाडी वैदेशिक रोजगारमा छन् ।” उहाँ भन्नुहुन्छ, “खेलकूदमा खेलाडीको सुविधा र सुरक्षा नभएकाले पलायन हुने क्रम बढेको हो ।”

खेल जगत्मै रहँदा सँगैका खेलाडी जहरसिंह चौधरीसित केही वर्षअघि विवाह बन्धनमा बाँधिनु भएकी निर्मलाले घरायसी कामसँगै खेलकूदलाई निरन्तरता दिँदै आउनुभएको छ । “उहाँ (श्रीमान्) र मैले प्रथम डाँनसँगसँगै पास गरेका थियौँ ।” खेलकूदमै बसेको प्रेम चार वर्षअघि विवाहमा परिणत भयो ।” दुई वर्षको छोरा समेत रहेको बताउनुहुने निर्मलाको बच्चाको स्याहार आमाले गर्नुहुन्छ । पछिल्लो समय होटल व्यवसायसमेत सञ्चालन गर्नुभएका चौधरी दम्पतीले थारू परिकार पाउने यहाँ रिसोर्टसमेत सञ्चालनमा ल्याएका छन् ।

“साँझ खेलकूदमा हुने गरे पनि अरु बेला कटेजमा हुन्छु ।” निर्मला भन्नुहुन्छ, “छैटौँ खेलकूद यहाँ हुँदा तीन महीने स्वयम्सेवक प्रशिक्षकमा समेत जागिर खाएको थिए ।”   उहाँसँगै थारू समुदायकै अर्की खेलाडी भीमदत्तनगरपालिका–३ बिचपुरीका सरस्वती चौधरी पनि तेक्वान्दोकै चौथो डाँन हुनुहुन्छ ।  निर्मलाभन्दा केही समयपछि तेक्वान्दो खेलमा प्रवेश गर्नुभएकी सरस्वतीले खेलसँगै अध्ययनलाई पनि निरन्तरता दिनुभएको छ  । सरस्वती पनि निर्मलापछिकी प्रदेशको चौथो डाँनमा एक्ली महिला खेलाडी बन्नु भएको हो । “राष्ट्रिय प्रतियोगितामा समेत बिना पदक कहिल्यै फर्किनु परेन ।” उहाँ  भन्नुहुन्छ, “पाँचौँ राष्ट्रिय खेलकूद प्रतियोगितादेखि यसलाई निरन्तरता दिँदै आएकी छु । ”

नाताले निर्मला सरस्वतीकी भाउजू पर्नुहुन्छ । “भाउजू भए पनि हामी शुरुदेखि नै साथी जस्तै हौँ ।” स्नातकोत्तर तहमा अध्ययनरत सरस्वती भन्नुहुन्छ, “महिलाले त झन आत्मरक्षाका लागि पनि खेलकूदमा आउन जरुरी छ ।” दाइको प्रेरणाबाट खेलजगत्मा आएको उल्लेख गर्दै  उहाँ यसबाटै पनि वैदेशिक रोजगारमा धेरै सम्भावना रहेको बताउनुहुन्छ । निर्मला पाँचौँ डाँन खेलाडी बनेपछि उहाँका प्रशिक्षक मोहनप्रताब गुरुङ पनि खुशी  हुनुहुन्छ ।“विसं २०४२ सालदेखि महेन्द्रनगरमा तेक्वान्दो प्रशिक्षण शुरु भएको इतिहास छ ।” प्रशिक्षक गुरुङले भन्नुहुन्छ “यो अवधिमा महिला खेलाडीतर्फ निर्मला र सरस्वतीले पाएको सफलता गर्वको विषय हो ।”“दुई दशकसम्म निस्वार्थ खेलजगत्मै रहनु निर्मलाको ठूलो लगानी हो ।” गुरुङ भन्नुहुन्छ, “उनको सफलताले हाम्रो पनि शिर उचो भएको छ ।” पाँचौँ डाँनलाई स्नातक उत्तीर्णसम्म मान्यता दिइने उहाँको भनाइ छ ।

पछिल्लो समय कवर्ड हलमा पहिलो पटक राष्ट्रिय खेलकूद परिषद्को रु २५ लाख लगानीमा तेक्वान्दोको प्रशिक्षण केन्द्रसमेत निर्माण भएको छ । कञ्चनपुरमा करीब आधा दर्जन तेक्वान्दो डोजाङ सञ्चालन रहेकामा जिल्लाभर करीब ७०० खेलाडी रहेको प्रशिक्षक गुरुङ जानकारी दिनुहुन्छ । खेलकूदमा भविष्य नदेख्दा खेलाडी पलायन हुने गरेको प्रशिक्षक गुरुङको भनाइ छ । “खेलकूदमा लागेर रोजगारलगायत सुरक्षाको सुनिश्चितता भएमात्रै खेलकूदको विकास हुनसक्छ ।” उहाँ भन्नुहुन्छ, “आफ्नै लगानीमा प्रतियोगितामा भाग लिनुपर्ने अवस्था अझै अन्त्य भएको छैन ।”(रासस)

Loading...